უსაფრთხო სივრცე იმისთვის, რაც დაუსრულებელი დარჩა.

ეს შეიძლება იყოს უთქმელი სიტყვები, ბოლომდე განუცდელი ემოციები, შეწყვეტილი ურთიერთობები ან მოვლენები, რომელთა გადამუშავებაც იმ დროს ვერ შევძელით. ასეთ გამოცდილებებს გეშტალტთერაპიაში „დაუსრულებელ გეშტალტებს“ ვუწოდებთ. ისინი ხშირად აგრძელებენ ჩვენს ცხოვრებაზე ზემოქმედებას - გვაბრუნებენ ერთსა და იმავე განცდებთან, ურთიერთობების მსგავს სცენარებთან ან შინაგან დაძაბულობასთან.

თერაპიულ პროცესში ვცდილობ კლიენტის გვერდით ყოფნას და მისი გამოცდილების კვალდაკვალ სიარულს - იქ, სადაც ჩნდება ემოციები, კითხვები და გაცნობიერებები. სწორედ ამ პროცესში იშლება ძველი გამოცდილებები და ჩნდება შესაძლებლობა უფრო თავისუფალი, ავთენტური და ცოცხალი ცხოვრებისკენ.